काठमाडौं । कृषि विकास बैंक लिमिटेड (ADBL) ले आर्थिक वर्ष २०८१/८२ का लागि आफ्ना सेयरधनीहरूलाई कुल १३ प्रतिशत लाभांश वितरण गर्ने प्रस्ताव गरेको छ। बैंकको सञ्चालक समितिको बैठकले उक्त निर्णय गरेको हो।
निर्णय अनुसार, बैंकले ३.२५ प्रतिशत बोनस सेयर र ९.७५ प्रतिशत नगद लाभांश (करसहित) वितरण गर्ने प्रस्ताव अघि सारेको छ। यो प्रस्ताव नेपाल राष्ट्र बैंकको स्वीकृति तथा बैंकको आगामी वार्षिक साधारणसभाबाट अनुमोदन भएपछि मात्र लागू हुनेछ।
बैंकको जारी पूँजी रू. १३ अर्ब ८५ करोड रहेको छ। हाल बजारमा कृषि विकास बैंकको प्रतिशेयर अन्तिम कारोबार मूल्य (LTP) रू. ३१५.०० मा रहेको छ।
हालको आर्थिक चुनौतीपूर्ण अवस्थामध्ये पनि बैंकले स्थायित्व कायम राख्दै सन्तोषजनक प्रदर्शन गरेको बताइएको छ। प्रमुख कार्यकारी अधिकृत गोविन्द गुरुङको नेतृत्वमा बैंकले प्रतिकूल परिस्थितिमा समेत सकारात्मक वित्तीय नतिजा प्रस्तुत गर्न सफल भएको मानिन्छ।
उक्त प्रस्तावले सेयरधनीहरूमा आत्मविश्वास बढाउने र बैंकको आगामी नीतिगत दिशाबारे सकारात्मक सन्देश दिने अपेक्षा गरिएको छ।