ई-आर्थिक, काठमाडौं । नेपाल टेलिकमले जिएसएम पोस्टपेड सेवामा नयाँ सुविधा पुनः दोहोरिने सजिलो अनलिमिटेड प्याकेज (Recurring Sajilo Unlimited Package) सुरु गरेको छ। यो योजना २०८२ असोज ३१ गतेदेखि लागू भएको हो।
नयाँ प्रणालीअनुसार, टेलिकमले ग्राहकको मागलाई ध्यानमा राख्दै सजिलो अनलिमिटेड प्याकेजहरू स्वचालित रूपमा प्रत्येक अंग्रेजी महिनाको १५ गते नवीकरण (Renew) हुने व्यवस्था गरेको छ।
यस योजनामा ६९९, ७९९, ९९९, १४९९ र कार्यकारी प्याकेजहरूलाई मुख्य प्रस्तावको रूपमा समावेश गरिएको छ। ग्राहकले पहिलोपटक प्याकेज खरिद गर्दा अंग्रेजी महिनाको बाँकी दिनअनुसार अनुपातिक आधार (Pro-Rate) मा शुल्क कटौती हुनेछ, र त्यसपछिका महिनामा प्रत्येक १५ तारिखमा स्वतः नवीकरण हुनेछ।
टेलिकमका अनुसार, यदि नवीकरणको समयमा ग्राहकको ऋण सीमा (Credit Limit) पर्याप्त नभएमा सेवा अवरुद्ध हुनेछ र भुक्तानी गरेपछि मात्र सेवा पुनः सुरु हुनेछ। आवश्यक परेमा ग्राहकले थप इन्टरनेट वा सन्देश (एसएमएस) प्याकेजहरू पनि छुट्टै खरिद गर्न सक्नेछन्।
यदि कुनै ग्राहकले नयाँ पुनः दोहोरिने प्याकेज छनोट गरेमा, त्यो प्याकेज प्रतीक्षारत (Pending) अवस्थामा रहनेछ र अर्को अंग्रेजी महिनाको १५ गते मात्र सक्रिय (Active) हुनेछ। यस्तै, साधारण प्याकेज लिएको खण्डमा अवधि कम भएको प्याकेजको सेवा पहिला प्रयोग हुनेछ।
यो सेवा रद्द (Deactivate) गर्न चाहने ग्राहकले जिएसएम पोस्टपेड अफर (रु. ३००) खरिद गरी पुनः दोहोरिने सेवा बन्द गर्न सक्नेछन्।
प्याकेज सुरु गर्न ग्राहकले *१४१५*२*४# डायल गरी विकल्प छनोट गर्नुपर्नेछ। थप जानकारीका लागि १४९८ मा सम्पर्क गर्न सकिने नेपाल टेलिकमले जनाएको छ।