ई–आर्थिक, काठमाडौं । नेपाली सुनचाँदी बजारमा सुनको मूल्यले आज पुनः ऐतिहासिक उचाइ कायम गरेको छ। सोमबार सुन प्रतितोला २ लाख ५ हजार ३ सय रुपैयाँमा कारोबार भइरहेको नेपाल सुनचाँदी व्यवसायी महासंघले जानकारी दिएको छ।
गत शुक्रबार पहिलोपटक सुनको मूल्यले २ लाख नाघेको थियो। सो दिन प्रतितोला मूल्य २ लाख ६ सय रुपैयाँ पुगेको थियो भने आइतबार थप बृद्धीसँगै २ लाख ३ हजार ६ सय रुपैयाँमा कारोबार भएको थियो। आज सोमबार फेरि २ हजार रुपैयाँले वृद्धि भई नयाँ कीर्तिमान कायम भएको हो।
सुनसँगै चाँदीको मूल्यमा पनि वृद्धि देखिएको छ। आइतबार २ हजार ४२५ रुपैयाँमा रहेको चाँदी आज ४५ रुपैयाँले बढेर प्रतितोला २ हजार ४७० रुपैयाँ पुगेको छ।
विश्लेषकहरूका अनुसार अन्तर्राष्ट्रिय बजारमा सुनको मूल्यमा भइरहेको चहलपहल र माग उच्च भएको कारणले नेपाली बजारमा पनि मूल्य उकालो लागेको हो।