ई-आर्थिक, काठमाडौं । नेपाल विद्युत प्राधिकरणले भारतमा दैनिक ७ सय मेगावाट विजुली निर्यात गर्न थालेको छ । नेपालमा वर्षायामसंगै नदिप्रवाह बढेसंगै जलविद्युत उत्पादन पनि बढिरहेको हो ।
नेपाल विद्युत् प्राधिकरणले नेपालमा खपत भएर बचत भएको विद्युत भारत तथा बंगलादेशमा निर्यात भएको जानकारी दियो ।
प्राधिकरणका अनुसार देशभित्रको कुल विद्युत् उत्पादन २ हजार ७ सय मेगावाट पुगेको छ। हाल दैनिक पिक डिमान्ड २ हजार मेगावाट र सामान्य माग १ हजार ८ सय मेगावाटको हाराहारीमा रहेको छ।
भारतमा साढे ६ सयदेखि ७ सय मेगावाट र बंगलादेशमा ४० मेगावाट निर्यात भइरहेको प्राधिकरणले बतायो । असार १ गतेदेखि बंगलादेशमा ४० मेगावाट विजुली निर्यात भैरहेको छ ।
विद्युत् निर्यातमार्फत देशको व्यापार घाटा घटाउन र जलविद्युतको पूर्ण उपयोग गर्न सहयोग पुग्ने प्राधिकरणको विश्वास लिएको छ ।