ई-आर्थिक, काठमाडौं । भाटभटेनी सुपर मार्केटको गाडीमा अवैध रूपमा विद्युतीय सिगरेट फेला परेको छ । भाटभटेनी सुपर मार्केटको सामान ल्याइएको डिब्बामा भन्सार जाँच पास नगराई अवैध रूपमा विद्युतीय सिगरेट फेला परेको इलाका प्रहरी कार्यालय बाह्रबिसेले जनाएको छ । प्रहरीले मंगलबार भाटभटेनीको गाडीबाट ७ सय ४० थान विद्युतीय सिगरेट बरामद गरेको थियो ।
तातोपानी भन्सारबाट भाटभटेनीको सामान बोकी काठमाडौँतर्फ जाँदै गरेको मालवाहक डिब्बामा विद्युतीय सिगरेट ‘भेप’ बरामद भएको जिल्ला प्रहरी कार्यालयले जानकारी दिएको छ । ना.६ ख ५४९६ नंम्वरको डिब्बा गाडीबाट ९३ डब्बा सामाग्री बरामद भएको छ ।
बरामद भएको सामाग्रीको अन्दाजी मूल्य २२ लाख २० हजार रहेको छ ।
बरामद भएको सामाग्री सहित चालक भोटेकोसी गाउँपालिका वडा नंम्वर २ का प्रवीण खत्री र डिब्बा गाडी नियन्त्रणमा लिइ राजस्व कार्यालय हरिहर भवनमा पठाउने तयारी गरिएको छ ।