ई–आर्थिक, काठमाडौं । उत्तर कोरियाले आइतबार बिहान पूर्वी तटमा एकसाथ आठ छोटो दूरीका ब्यालेस्टिक मिसाइल प्रहार गरेको छ ।
दक्षिण कोरिया र अमेरिकाले आफ्नो पहिलो संयुक्त सैन्य अभ्यास एक दिनअघि सम्पन्न गरेपछि उत्तर कोरियाले मिसाइल प्रहार गरेको समाचार एजेन्सी रोयटर्सले जनाएको छ ।
रोयटर्सका अनुसार यी मिसाइलहरू उत्तर कोरियाको राजधानी प्योङयाङको सुनान क्षेत्रबाट प्रहार गरिएको थियो ।
यसैगरी, जापानको क्योडो समाचार एजेन्सीले सरकारी स्रोतलाई उद्धृत गर्दै उत्तर कोरियाले एकैपटक धेरै मिसाइल प्रहार गरेको जनाएको छ ।
अमेरिकी विशेष दूतसँग किम जोङ दक्षिण कोरियाको भ्रमणमा गएपछि उत्तर कोरियाले यस्तो गरेको हो ।
उनले आफ्ना दक्षिण कोरिया र जापानी समकक्षीसँग भेट गरेका थिए । सन् २०१७ यता उत्तर कोरियाले पहिलो पटक आणविक परीक्षण गर्ने सम्भावना छ ।
अमेरिकाले उत्तर कोरियालाई आफ्नो कूटनीतिको ढोका खुला रहेको र प्रतिबन्धहरू खुकुलो पार्ने विषयमा छलफल गर्न पनि तयार रहेको स्पष्ट रूपमा बताएको छ ।
गत साता अमेरिकाले उत्तर कोरियाविरुद्ध संयुक्त राष्ट्रसंघमा थप प्रतिबन्ध लगाउन चाहेको थियो, तर चीन र रुसले त्यसको विरोध गरेका थिए ।
सन् २००६ पछि चीन र रुसले उत्तर कोरियामाथि प्रतिबन्ध लगाउन संयुक्त राष्ट्र सुरक्षा परिषदमा भिटो लगाएको यो पहिलो पटक हो । २००६ मा उत्तर कोरियाले आफ्नो पहिलो परमाणु परीक्षण गरेको थियो ।