ई–आर्थिक, काठमाडौं । ग्लोबल आइएमई बैंकले कोरोना भाइरस (कोभिड –१९) विरुद्धको अभियानमा प्रदेश नं ५ सरकारलाई २५ लाख रुपैयाँ सहयोग गरेको छ । बैंकको प्रदेश नं ५ को कार्यालयले उक्त रकम सहयोग गरेको हो ।
बैंकको प्रदेश नं ५ का नायब प्रदेश प्रमुख दिलीप डाँगीले प्रदेश नं ५ सरकारका मुख्यमन्त्री शङ्कर पोखरेललाई उक्त रकमको चेक हस्तान्तरण गरे ।
सो अवसरमा मुख्यमन्त्री पोखरेलले सामाजिक क्षेत्रमा बैंकको सहयोगको निरन्तरताको अपेक्षा गरे ।
बैंकका भैरहवा शाखा प्रमुख प्रेमसागर अग्रहरीले बैंकको योगदानबाट भाइरसविरुद्व लड्न थप प्रेरणा र सहयोग हुने विश्वास व्यक्त गरे ।
आफ्नो स्थापनाकालदेखि विपत्तिका अवस्थामा आफ्नो सामाजिक उत्तरदायित्वलाई प्राथमिकतामा राखेर विभिन्न कार्यमा सहयोग गर्दै आएको र आगामी दिनमा समेत यस्तो सहयोगलाई निरन्तरता दिँदै जाने बैंकको प्रदेश कार्यालयले जनाएको छ ।
कोभिड –१९ विरुद्धको अभियानमा प्रदेश नं ५ सरकारलाई २५ लाख सहयोग गरेको बैंकले एक करोड १५ लाख रुपैयाँ केन्द्र सरकारलाई यसअघि नै हस्तान्तरण गरिसकेको छ ।