२९ वैशाख, रामपुर(पाल्पा)। रामपुर नगरपालिका–६ विजयपुरकी अगुवा कृषक निर्मला पोखरेल गोलभेँडा बिक्रीबाट एउटै याममा रु दुई लाख बराबरको आम्दानी गर्नुभएको छ ।
एक रोपनी जग्गामा लगाएको गोलभेँडाबाट उहाँले सो आम्दानी गर्न सफल हुनुभएको हो । उहाँले अमिता र सिर्जना जातको गोलभेँडा लगाउनुभएको छ । विगत तीन वर्षयता पोखरेलले व्यावसायिक रुपमा तरकारीखेती गर्दै आउनुभएको छ ।
उहाँ भन्नुहुन्छ – “थोरै जग्गामा सोचेभन्दा पनि तेब्बर उत्पादन भयो” – “बजारमा पनि गोलभेँडाको बिक्री मूल्य राम्रै पाइयो, व्यवसायबाट एकदमै सन्तुष्ट छु ।”
गोलभेँडाखेतीसँगै उहाँले काँक्रा, घिरौला, लौका, करेला, सिमी जातका तरकारी दुई रोपनी जग्गामा लगाउनुभएको छ । अहिले उहाँले गोलभेँडा प्रतिकिलो रु ४०, घिरौला रु ७०, काँक्रा रु ४० र करेला रु ८० मा घरबाटै बिक्री गरिरहनुभएको छ ।
उत्पादन बढेपछि उहाँले एक रोपनीबाट विस्तार गरेर तीन रोपनीमा गोलभेँडाखेती विस्तार गर्ने सोच बनाउनुभएको छ । “व्यवसाय नगर्दासम्म घरखर्च र बालबच्चाको पढाइ खर्च चलाउन धौधौ थियो, तरकारी खेती सुरु गरेपछि सबै सहज भएको छ,” उहाँले भन्नुभयो ।
घरखर्च, दुई छोराको पढाइ खर्चबाट बाँकी रहेको रकम उहाँले सहकारीमा बचत गर्दैआउनुभएको छ । रासस