१३ माघ, काठमाडौँ । आजदेखि बनस्थली-बानेश्वर-काँडाघारी रुटमा सिटी मेट्रो कम्पनीले १५ वटा ‘जुपीटर’ बसको सेवा सुरु गरेको छ ।
सिटी मेट्रो कम्पनीका यी ठूला बसहरु वनस्थलीबाट छुटेर नारायणगोपाल चोक पुग्नेछन् र त्यहाँबाट बालुवाटार, पुतलीसडक, माइतिघर, बानेश्वर, कोटेश्वर, पेप्सीकोला हुँदै काँडाघारीसम्म पुग्नेछन् ।
कम्पनीका अध्यक्ष हेमेन्द्र शेरचनले बनस्थलीबाट बानेश्वर आउनेहरुलाई दुईवटा बस फेर्नुपर्ने झण्झट र दोहोरो खर्च बेहोर्नुपर्ने बाध्यता अब नहुने बताउनुभयो ।
सिटी मेट्रो कम्पनीका यी बसहरु अपांगमैत्री छन् जसलाई ‘जुपिटर’ नाम दिइएको छ । साझापछि निजी क्षेत्रबाट पहिलोपटक काठमाडौंमा अपांगमैत्री यात्रु बस चलाउने यो पहिलो कम्पनी हो ।
यी ठूला बसहरुलाई नेपाल यातायातको भरपर्दो, सजिलो र स्तरीय विकल्पको रुपमा लिइएको छ । यी ठूला बसले काठमाडौंका सडकबाट साना सवारी साधन विस्थापन गर्ने सरकारको योजनालाई सहयोग गर्ने विश्वास गरिएको छ ।
सबै बसहरु टाटा इण्डिया कम्पनीका हुन् । यी बसहरु ४० सिट क्षमताका छन् । बस हेर्दा आकर्षक मात्रै छैनन्, चढ्न पनि आरामदायी छन् । उभिने यात्रुका लागि ह्यांगर छन् भने पर्याप्त ‘स्पेश’ का कारण उँभिनेलाई पनि सास्ती कम हुनेछ ।