ई–आर्थिक, ललितपुर । ललितपुर कुमारीपाटीस्थित आर्जन बचत तथा ऋण सहकारी संस्थाले शेयरधनीलाई ८ प्रतिशत नगद लाभांश प्रदान गर्ने भएको छ । शनिवार सम्पन्न संस्थाको १४औं साधारणसभाले सो लाभांश पारित गरेको हो ।
प्रतिवेदनअनुसार गत आर्थिक वर्ष (आव) २०७९/८० सम्ममा संस्थाको चुक्ता शेयर पूँजी ३ करोड ३९ लाख रुपैयाँ पुगेको छ । संस्थाको कारोबारमा भने अघिल्लो आर्थिक वर्ष २०७८/७९ को तुलनामा १२ दशमलव १० प्रतिशतले संकुचन आएर २९ करोड ५३ लाख रुपैयाँ पुगेको संस्थाको तथ्यांक छ ।
संस्थाका अनुसार गत आव २०७९/८० सम्ममा संस्थाले २२ करोड ३६ लाख रुपैयाँ बराबर निक्षेप संकलन र २३ करोड २१ लाख रुपैयाँ कर्जा लगानी गरेको बताइएको छ । गत आवसम्ममा आयकरपछिको खुद नाफा ७६ लाख रुपैयाँ आर्जन गर्न सफल भएको संस्थाको भनाइ छ ।