महिलाहरुको उद्यमशीलता विकासमा सामाजिक संरचना बाधक रहेको बताउँदै सम्बद्ध वक्ताहरुले त्यसलाई सामना गर्न सबैको सामूहिक प्रयासको खाँचो औल्याएका छन् । ललितपुर उद्योग वाणिज्य संघले आयोजना गरेको महिलाको उद्यमशीलता र सशक्तिकरण विषयक अन्तरक्रिया कार्यक्रममा बोल्दै उनीहरुले सो खाँचो औल्याएका हुन् ।
सो अवसरमा नेपाल उद्योग वाणिज्य महासंघका वरिष्ठ अध्यक्ष भवानी राणाले सामाजिक संरचनासंग जुधेर महिलाहरु आर्थिक विकास अधि बढ्न आत्मविश्वास र एक्सपोजरको क्षमता बढाउनुपर्नेमा जोड दिनुभयो । कमाउन सक्ने महिला हुनुमा महिलाका लागि मात्र नभई घर, परिवार र सबैको विकाससंग जोडिएको उल्लेख गर्दै वरिष्ठ उपाध्यक्ष राणाले महिलालाई आर्थिक विकासमा अघि बढाउनु समाजलाई समृद्धि बनाउनु रहेको धारणा राख्नुभयो ।
उहाँले एक दुई जना महिलाहरु ठूलठूला ओहोदामा पुग्दैमा समग्र महिलाहरुको विकासको भएको मान्न नसकिने बताउँदै समुदायको तृणमूलमा (ग्रास रुट) मा रहेका महिलाहरुलाई आर्थिक रुपमा सशक्तिकरण बनाउनुपर्ने खाँचो पनि औल्याउँनुभयो ।
ललितपुर उद्योग वाणिज्य संघका अध्यक्ष सविन श्रेष्ठले यस कार्यक्रम महिलाहरुको उद्यमशीलता विकासका लागि संघले आयोजना गरेको सम्भवतः पहिलो कार्यक्रम रहेको बताउनुभयो । महिलाहरुको आर्थिक विकासमा स्वयं महिलाहरुसंगै पुरुषसंगै घर परिवार नै लाग्नुपर्ने पनि उहाँको जोड थियो । अध्यक्ष श्रेष्ठले उद्यमी महिलाहरुको संख्या बढाउन संघ लागिपरेको जानकारी दिँदै राज्यले उपलब्ध गराएका सीमित सुविधाहरु उपयोग गरी महिलाहरु अघि बढ्नुपर्ने धारणा राख्नुभयो ।
सो अवसरमा घरेलु तथा साना उद्योग कार्यालय ललितपुरका प्रमुख रोशनीकुमारी श्रेष्ठ, नेपाल उद्योग वाणिज्य महासंघ महिला उद्यम विकास समितिका सभापति कमला श्रेष्ठ, महिला उद्यमीद्वय रीता भट्टराई र सन्तोषी राणाले महिला उद्यमशीलताका विविध पाटोलाई केन्द्रीत गर्दै कार्यपत्र प्रस्तुत गर्नुभयो । संघका कार्यकारिणी सदस्य एवं महिला उद्यम विकास समितिका संयोजक लजना श्रेष्ठको संयोजकत्वमा भएको सो कार्यक्रममा स्थापित भइसकेको, नवउद्यमी र उद्यमी बन्ने इच्छा गरिराखेका गरी ६८ जना महिलाको सहभागिता रहेको थियो ।
कार्यक्रममा सहभागी भएर आर्थिक विकासमा अझ दृढका साथ लाग्न हौसला प्रदान गरेको सहभागी महिलाहरु बताए । कार्यक्रम धेरै प्रभावकारी लाग्यो । बेलाबखत यस्ता कार्यक्रमहरु गर्दै जाने हो भने महिलाहरुको आर्थिक विकासमा ठोस उपलब्धी हुने अनुभव साटासाट गर्ने क्रममा सहभागीहरुको भनाई थियो ।