काठमाडौं । रसुवास्थित चिलिमे हाइड्रोपावरमा कार्यरत ९ जना कामदार धादिङको रुबीभ्याली गाउँपालिका हुँदै सशस्त्र प्रहरीको सम्पर्कमा पुगेका छन्।
बाढी तथा पहिरोका कारण सडक तथा स्थलमार्ग प्रभावित भइरहेका बेला उनीहरू रुबीभ्याली हुँदै सशस्त्र प्रहरीको बीओपीमा पुगेका हुन्।
सशस्त्र प्रहरीका डीएसपी अपार प्याकुरेलका अनुसार सशस्त्र प्रहरीको सम्पर्कमा आउनेमा स्याङ्जाका नारायण भट्टराई, कैलालीका रामसुन्दर चौधरी, अर्जुन चौधरी, प्रेम चौधरी, महादेव डंगौरा, श्यामनारायण कठरिया र विजय डंगौरा तथा बाजुराका प्रकाशबहादुर धामी र उमेश धामी रहेका छन्।
उनीहरू चिलिमे हाइड्रोपावरमा कार्यरत थिए। बाढी तथा पहिरोका कारण आयोजना क्षेत्र र आसपासको आवागमन प्रभावित बनेपछि उनीहरू रुबीभ्याली हुँदै सशस्त्र प्रहरीको सम्पर्कमा आएका हुन्।
सशस्त्र प्रहरीले उनीहरूको अवस्थाबारे आवश्यक जानकारी लिने तथा सम्बन्धित निकायसँग समन्वय गरिरहेको जनाएको छ। बाढी तथा पहिरोका कारण विभिन्न जलविद्युत् आयोजना क्षेत्रमा कामदार तथा स्थानीयवासी प्रभावित भइरहेका बेला उनीहरू सुरक्षित रूपमा सुरक्षा निकायको सम्पर्कमा आउनुलाई उद्धार प्रयासमा महत्वपूर्ण उपलब्धिका रूपमा लिइएको छ।