काठमाडौं । चालु आर्थिक वर्ष २०८२/८३ को फागुन मसान्तसम्म देशभर ४ सय १३ किलोमिटर नयाँ कालोपत्र सडक निर्माण भएको छ।
बुधबार सार्वजनिक गरिएको आर्थिक सर्वेक्षण २०८२/८३ अनुसार हालसम्म देशभर कुल २० हजार ४ सय ५६ किलोमिटर सडक कालोपत्र भइसकेको छ।
सर्वेक्षणअनुसार ७ हजार ६ सय २ किलोमिटर ग्राभेल सडक तथा ८ हजार ७ सय ४८ किलोमिटर कच्ची सडक निर्माण भएको छ। यससँगै देशभर निर्माण भएका सडकको कुल लम्बाइ ३६ हजार ८ सय ६ किलोमिटर पुगेको छ।
गत आर्थिक वर्ष २०८१/८२ को असार मसान्तसम्म २० हजार ४३ किलोमिटर कालोपत्र, ७ हजार ५ सय ११ किलोमिटर ग्राभेल तथा ८ हजार ६ सय ७२ किलोमिटर कच्ची सडक रहेको थियो।
यस अवधिमा स्थानीय पूर्वाधारतर्फ भने सडक विस्तारको गति सुस्त देखिएको छ। आर्थिक सर्वेक्षणअनुसार असार २०८२ देखि फागुन २०८२ सम्म जम्मा ७ किलोमिटर मात्रै सडक विस्तार भएको छ।
असार २०८२ सम्म देशभर ६८ हजार ९३ किलोमिटर सडक विस्तार भएकोमा फागुनसम्म थप ७ किलोमिटर विस्तार भई कुल सडक विस्तार ६८ हजार १ सय किलोमिटर पुगेको सर्वेक्षणमा उल्लेख गरिएको छ।