ग्राहक डाटा सुरक्षित रहेको नबिल बैंकको दाबी, भ्रामक सूचना नमान्न आग्रह
काठमाडौं । नबिल बैंकले ग्राहकको गोपनीयता भंग गरी कारोबार विवरण चुहावट गरेको भन्ने आरोप पूर्ण रूपमा अस्वीकार गर्दै यसको खण्डन गरेको छ।
बैंकले एक प्रेस विज्ञप्ति जारी गर्दै केही सामाजिक सञ्जाल तथा सञ्चार माध्यममा फैलाइएको सूचना आधारहीन, भ्रामक र प्रमाणविहीन रहेको दाबी गरेको हो। यस्ता दुष्प्रचारले बैंकिङ सेवाप्रतिको जनविश्वासमा असर पार्ने प्रयास भएको भन्दै बैंकले गम्भीर ध्यानाकर्षण भएको जनाएको छ।
बैंकका अनुसार ग्राहकको गोपनीयता सम्बन्धी विवरण केवल ग्राहक स्वयं, आधिकारिक प्रतिनिधि वा कानूनी प्रक्रिया अन्तर्गत नियामकीय तथा अनुसन्धान निकायलाई मात्र उपलब्ध गराइने व्यवस्था छ। कुनै पनि अनधिकृत व्यक्ति वा निकायलाई जानकारी नदिइएको र दिन नसकिने बैंकले स्पष्ट पारेको छ।
मिति २०८३ वैशाख ९ गते प्रकाशित एक समाचारलाई आधार बनाई सामाजिक सञ्जालमा बैंकविरुद्ध नियोजित रूपमा गलत प्रचार गरिएको बैंकको आरोप छ। बैंकले कुनै पनि ग्राहक विवरण लिएको वा उपलब्ध गराएको भए त्यसको सम्पूर्ण रेकर्ड कोर बैंकिङ प्रणालीमा सुरक्षित रहने समेत जनाएको छ।
बैंकले आफूलाई लागेका आरोपहरू गलत र भ्रामक भएको दोहोर्याउँदै प्रचलित कानून, नियमन तथा आन्तरिक नीतिअनुसार ग्राहक गोपनीयता उच्च प्राथमिकतामा राखिएको स्पष्ट पारेको छ।
नबिल बैंकले चार दशकभन्दा बढीको विश्वसनीय इतिहास बोकेको संस्था भएको उल्लेख गर्दै कुनै पनि ग्राहक विवरण अनधिकृत रूपमा बाहिर नजाने दाबी गरेको छ। साथै, यस्ता भ्रामक सूचना फैलाउने व्यक्ति वा निकायविरुद्ध विद्युतीय कारोबार ऐन, २०६३ लगायत प्रचलित कानुनअनुसार कानुनी कारबाही अघि बढाइने चेतावनीसमेत दिएको छ।
बैंकले ग्राहक तथा सर्वसाधारणलाई यस्ता भ्रामक सूचनामा विश्वास नगर्न आग्रह गर्दै सुरक्षित र विश्वसनीय बैंकिङ सेवा निरन्तर प्रदान गरिने जनाएको छ।
यस्तो छ बैंकको खण्डन
ग्राहक सूचनाको गोपनीयता सम्बन्धी भ्रामक जानकारीको खण्डन तथा स्पष्टिकरण
केही दिनयता विभिन्न सामाजिक सञ्जाल तथा केहि सञ्चार माध्यममा नबिल बैंकले ग्राहकको गोपनीयता भंग गरी ग्राहकको कारोबारसम्बन्धी जानकारी चुहावट गरेको भन्ने आधारहीन तथा प्रमाणविहीन प्रचार–प्रसार भइरहेकोप्रति बैंकको गम्भीर ध्यानाकर्षण भएको छ। यस्ता भ्रामक सूचनाले जनमानसमा बैंकिङ सेवाप्रतिको विश्वासलाई प्रभावित पार्ने प्रयास गरेको देखिएकाले बैंक यस किसिमको भ्रमपूर्ण तथा प्रमाणविहीन सम्प्रेषणको स्पष्ट रूपमा खण्डन गर्दछ।
मिति २०८३ वैशाख ९ गते कान्तिपुर दैनिकमा प्रकाशित “गृहमन्त्री गुरुङको कारोबारका तथ्य बाहिरिँदा बढ्दै गएका प्रश्नहरु” शीर्षकको समाचारमा स्पष्ट रूपमा कान्तिपुर दैनिकले “अनुसन्धानरत निकायबाट प्राप्त गरेका बैंकिङ कारोबारको विवरण…..” भनी उल्लेख गरेको छ। उक्त समाचारमा विभिन्न बैंक तथा वित्तीय संस्थाहरूमा विभिन्न मितिमा भएका कारोबारहरू प्रकाशित भएको तथ्यलाई नजरअन्दाज गर्दै केही व्यक्तिहरूद्वारा सामाजिक सञ्जालमार्फत बैंकविरुद्ध नियोजित रूपमा दुष्प्रचार गरिएकोप्रति बैंकको गम्भीर ध्यानाकर्षण भएको छ।
बैंक सम्पूर्ण सरोकारवालाहरूलाई स्पष्ट रूपमा जानकारी गराउन चाहन्छ कि कुनै पनि ग्राहकको सूचना वा कारोबार विवरण ग्राहक स्वयं, निजको आधिकारिक प्रतिनिधि, वा नियामकीय तथा अनुसन्धानकारी निकायहरूले कानूनी प्रक्रिया अनुसार मागेको अवस्था बाहेक बैंकले कुनै पनि सञ्चार माध्यम, व्यक्ति वा अनधिकृत निकायलाई उपलब्ध गराउन मिल्दैन, गराउँदैन र गराएको पनि छैन।
बैंकको कुनै पनि ग्राहकको विवरण कसैले लिएको अवस्थामा बैंकको रेकर्डमा कुन मितिमा, कुन कर्मचारीले, कुन प्रयोजनका लागि निकालेको हो भन्ने सम्पूर्ण विवरण तथा लगत बैंकको प्रणाली अर्थात् कोर बैंकिङ सिस्टममा सुरक्षित रूपमा अभिलेखित रहन्छ।
यस सम्बन्धमा बैंकमाथि लगाइएका सम्पूर्ण आरोप तथा अनुमानहरू गलत, भ्रामक तथा आधारहीन रहेको कुरा स्पष्ट पार्दछौं। इजाजतपत्र प्राप्त ‘क’ वर्गको वाणिज्य बैंकको हैसियतले नबिल बैंक लिमिटेडले प्रचलित कानून, नियमन, प्रावधान तथा निर्देशन एवं आन्तरिक सुशासन तथा सूचना सम्बन्धी नीतिहरूको पूर्ण रूपमा पालना गर्दै ग्राहक सूचनाको पूर्ण गोपनीयता कायम गर्न कटिबद्ध रहेको जानकारी गराउँदछ।
बैंकिङ गोपनीयता कायम राख्नु तथा ग्राहकको सूचनाको संरक्षण गर्नु बैंकिङ नैतिकता तथा अनुपालनको आधारभूत सिद्धान्त हो। बैंकले यस सम्बन्धमा सधैं उच्चतम मापदण्ड तथा अभ्यासहरूको पालना गर्दै आइरहेको समेत जानकारी गराउन चाहन्छौं।
नबिल बैंकजस्तो जिम्मेवार, चार दशकभन्दा बढीको विश्वसनीय इतिहास भएको बैंकले कुनै ग्राहकको व्यक्तिगत विवरण कुनै अनधिकृत व्यक्तिलाई हस्तान्तरण गर्ने वा जानकारी दिने सम्भावना छैन र रहँदैन।
सूचनाको स्पष्ट स्रोतसहित प्रकाशित समाचारलाई बंग्याउँदै बैंक सम्बन्धमा दुष्प्रचार गर्ने व्यक्ति तथा निकायलाई तथ्यहीन दुष्प्रचार नगर्न तथा जनमानसलाई भ्रमित नपार्न आग्रह गर्दछौं। साथै, नियोजित दुष्प्रचार गर्ने व्यक्तिमाथि विद्युतीय कारोबार ऐन, २०६३ तथा अन्य प्रचलित कानूनअनुसार कानूनी कारबाहीको प्रक्रियामा जान बैंक बाध्य हुनेछ।
बैंकका सम्पूर्ण ग्राहकवर्ग तथा सरोकारवालाहरूमा यस्ता दुष्प्रचारमा विश्वास नगर्न हुन अनुरोध गर्दछौं। साथै, बैंकले ग्राहक गोपनीयतामा सधैं सचेत रही, ग्राहक सुरक्षासम्बन्धी विभिन्न प्रविधिहरूको प्रयोगमार्फत उच्चतम सुरक्षित सेवा प्रदान गर्दै आएको र भविष्यमा पनि निरन्तर उच्च गुणस्तरीय, विश्वसनीय सेवा दिन सधैं कटिबद्ध रहेको पुनः विश्वास दिलाउन चाहन्छौं।
==========================================
कर्पोरेट सञ्चार शाखा