काठमाडौं । अख्तियार दुरुपयोग अनुसन्धान आयोगले पोखरा क्षेत्रीय अन्तर्राष्ट्रिय विमानस्थल निर्माणमा भ्रष्टाचारको आरोपमा २१ जनाविरुद्ध मुद्दा दायर गरेको छ।
संस्कृति, पर्यटन तथा नागरिक उड्डयन मन्त्रालयका तत्कालीन सचिव केदार बहादुर अधिकारी, नेपाल नागरिक उड्डयन प्राधिकरणका पूर्व महानिर्देशकहरू, कर्मचारी र ठेकेदार तथा परामर्शदाता कम्पनीका प्रतिनिधिहरू समावेश छन्।
अख्तियारको दाबी अनुसार, सुपरिवेक्षण परामर्शदाता नियुक्तिका लागि २८ लाख अमेरिकी डलरको रकम राखिएको भए पनि, प्राधिकरणको अलग बजेटबाट ४२.८९ करोड रुपैयाँ खर्च गरिएको र यसमा भ्रष्टाचार भएको प्रमाणित भएको छ। यसले कुल ४६.१५ करोड रुपैयाँ बराबरको सार्वजनिक सम्पत्तिमा हिनामिना, हानी र दुरुपयोग भएको देखाएको छ।
आयोगले आरोपपत्रमा प्रतिवादीहरूलाई भ्रष्टाचार निवारण ऐन, २०५९ को दफा १७ अनुसार कारबाही र बिगो असुल गर्न अदालतसँग माग गरेको छ।
अख्तियारले भनेको छ, “प्रतिवादीहरूले जानबुझी गैरकानुनी लाभका लागि योजना बनाएर सार्वजनिक सम्पत्तिको हिनामिना र दुरुपयोग गरेका हुन्।”