ई–आर्थिक, काठमाडौं । काठमाडौं उपत्यकामा आज तापक्रम निकै घटेको छ। आज बिहान ६ बजेर २७ मिनेटमा उपत्यकाको न्यूनतम तापक्रम ३ डिग्री सेल्सियस मापन भएको मौसमविद् उज्वल उपाध्यायले जानकारी दिए।
ललितपुरस्थित सानेपामा न्यूनतम तापक्रम ३ डिग्री सेल्सियस मापन गरिएको हो। मौसमविद् उपाध्यायका अनुसार आगामी घण्टामा तापक्रम अझै घट्न सक्ने अनुमान गरिएको छ, जसका कारण चिसोको महसुस थप बढेको छ।
आजको न्यूनतम तापक्रमको अन्तिम मापन बिहान ८ बजेर ४५ मिनेटमा गरिने मौसम पूर्वानुमान महाशाखाले जनाएको छ।
यसैबीच, आज तराई भू–भागका केही स्थानहरूमा हुस्सु तथा कुहिरो लागेको छ। मौसम पूर्वानुमान महाशाखाका अनुसार कोशी प्रदेश र गण्डकी प्रदेशका उच्च पहाडी तथा हिमाली भू–भागमा आंशिक बदली रहनेछ भने बाँकी भू–भागमा मौसम मुख्यतया सफा रहनेछ।