काठमाडौं। गत भदौमा भएको जेनजी आन्दोलनमा क्षतिग्रस्त भएका सरकारी सवारी साधनमध्ये केवल १० प्रतिशतको मात्रै बीमा भएको पाइएको छ।
अर्थ मन्त्रालयले सार्वजनिक गरेको प्रतिवेदन अनुसार आन्दोलनमा ८ हजार ४३० वटा सवारी साधन क्षतिग्रस्त भए, तर बीमा भएको सवारी साधन मात्र ८४८ वटा रहेको छ।
प्रतिवेदनअनुसार सवारी साधनको कुल क्षति ७ अर्ब ४४ करोड रुपैयाँ बराबर छ, तर बीमाले कभर गर्ने रकम ७६ करोड रुपैयाँ मात्रै रहेको छ।
क्षतिग्रस्त सवारी साधनमा हेभी सवारी साधन, मिनी बस/ट्रक, कार/जीप/भ्यान र मोटरसाइकल समावेश छन्। सबैभन्दा बढी क्षति मोटरसाइकल (५ हजार ९४३ वटा) र कार/जीप/भ्यान (१ हजार ६११ वटा) मा पुगेको छ।
विशेषज्ञहरूले कम बीमा भएको अवस्था सरकारी सम्पत्तिको जोखिम बढाउने बताउँदै पुनर्निर्माण र बीमा व्यवस्थामा सुधार आवश्यक रहेको बताएका छन्।