म्याग्दी । म्याग्दीको अन्नपूर्ण गाउँपालिका–१ भिरकाटेदेखि दोवा जोड्ने ८.२ किलोमिटर सडक १७ वर्षपछि स्तरोन्नति हुन थालेको छ।
विसं २०६६ मा स्थानीयको चन्दा सहयोगबाट खुलेको साँघुरो र जोखिमपूर्ण सडकलाई गाउँपालिकाले चालु आर्थिक वर्षमा १ करोड रुपैयाँ बजेट विनियोजन गरी सुधार थालेको हो।
६५ लाखमा ठेक्का पाएको निर्माण कम्पनीले बगरदेखि सुनारीटोल खण्डमा काम सुरु गरेको छ।
सडकलाई ६ मिटर फराकिलो बनाउने, नाली–पर्खाल निर्माण गर्ने र केही भागमा ढलान तथा ग्राभेल गर्ने योजना छ।
पुसभित्र काम सक्ने लक्ष्य राखिएको आयोजनाबाट दोवाका करिब ३०० घरपरिवार लाभान्वित हुने गाउँपालिकाले जनाएको छ।