काठमाडौं । चालु आर्थिक वर्षको मंसिर मसान्तसम्म निर्जीवन बीमा कम्पनीहरूले १९ अर्ब ४८ करोड ९६ लाख रुपैयाँ बीमा शुल्क संकलन गरेका छन्। नेपाल बीमा प्राधिकरणको तथ्यांकअनुसार सगरमाथा लुम्बिनी इन्स्योरेन्सले सबैभन्दा धेरै २ अर्ब २१ करोड रुपैयाँ बीमा शुल्क आर्जन गर्दै शीर्ष स्थान ओगटेको छ।
दोस्रो स्थानमा रहेको शिखर इन्स्योरेन्सले २ अर्ब १५ करोड रुपैयाँ र तेस्रो स्थानको हिमालयन एभरेष्ट इन्स्योरेन्सले २ अर्ब रुपैयाँ बराबरको बीमा शुल्क संकलन गरेका छन्।
यस अवधिमा सिद्धार्थ प्रिमियर, आईजीआई प्रुडेन्सियल, एनएलजी, नेको, युनाइटेड अजोड, सानिमा जीआईसी र ओरिएन्टल इन्स्योरेन्सले पनि १ अर्बभन्दा बढी बीमा शुल्क आर्जन गरेका छन्।
त्यस्तै लघु निर्जीवन बीमा कम्पनीहरूले मंसिर मसान्तसम्म ४९ करोड ६० लाख रुपैयाँ बराबरको बीमा शुल्क संकलन गरेको प्राधिकरणले जनाएको छ।
