ई–आर्थिक, भक्तपुर । काठमाण्डौ उपत्यकाका तीन मुख्य सहर—काठमाण्डौ, भक्तपुर र ललितपुर—को स्थापना दिवसको अवसर पारेर भक्तपुर सहरको ऐतिहासिक, सांस्कृतिक तथा जल–सम्पदा संरक्षणको महत्व उजागर गर्ने उद्देश्यसहित “भक्तपुर ३३ पोखरी परिक्रमा पदयात्रा” नामक स्मरणात्मक कार्यक्रम आयोजना हुने भएको छ।
पदयात्रा २०८२ पुस ५ गते, शनिबार बिहान १०:०० बजे भक्तपुरको च्याम्हासिँह पुखू (गायक कुम्ह सागरको घर अगाडि) बाट प्रारम्भ हुने आयोजक ‘घरेलु उद्योग अध्ययन विद्यार्थी समूह ब्लुबर्ड सेकेण्डरी स्कूल, कुमारीपाटी’ले जनाएको छ। कार्यक्रममा भक्तपुर सहरभित्र रहेका ऐतिहासिक ३३ वटा पोखरीहरूको सांस्कृतिक, सामाजिक तथा वातावरणीय महत्वबारे जनचेतना अभिवृद्धि गर्ने लक्ष्य राखिएको छ।
आयोजकका अनुसार पदयात्रामार्फत स्थानीय सम्पदाको संरक्षणमा सामुदायिक सहभागिता बढाउने, विद्यार्थी–नेतृत्वमा सिकाइ–आधारित पर्यटन अभ्यासलाई प्रवर्द्धन गर्ने तथा जल–सम्पदा संरक्षणप्रति आम नागरिकको चासो अभिवृद्धि गर्ने उद्देश्य राखिएको छ।
पदयात्रामा सहभागीहरूका लागि अनुभवी गाइड सेवा, दिउँसो परम्परागत नेवारी खाजा (सम्हे बजी सेट र दही) तथा घरेलु उद्योग प्रदर्शनीमा निःशुल्क प्रवेशको व्यवस्था गरिएको छ। कार्यक्रममा सहभागी हुन इच्छुक व्यक्तिहरूका लागि पदयात्रा सहयोग शुल्क प्रतिव्यक्ति रु १,०००/- तोकिएको छ।
वातावरण संरक्षणलाई ध्यानमा राख्दै कार्यक्रमको प्रवेश पत्र पुनःप्रयोग गरिएको कागजमा छापिने जनाइएको छ, जसले दिगो अभ्यासप्रति आयोजकको प्रतिबद्धता झल्काउँछ।
यस शैक्षिक, सांस्कृतिक तथा वातावरणीय महत्व बोकेको कार्यक्रममा वडा तहबाट आवश्यक समन्वय, सहजीकरण, सूचनाको प्रसार तथा स्थानीय सहभागिता अभिवृद्धिका लागि सहयोग गर्न आयोजकले सम्बन्धित निकाय तथा जनप्रतिनिधिहरूसमक्ष अपिल गरेको छ। वडा प्रतिनिधिहरूको उपस्थितिले कार्यक्रमलाई थप प्रभावकारी बनाउने विश्वास समेत आयोजकले व्यक्त गरेको छ।