युक्रेन । युक्रेनमा ऊर्जा पूर्वाधारलाई लक्षित गर्दै भएको पछिल्लो रूसी हवाई आक्रमणपछि सोमबार कम्तीमा सात क्षेत्रमा आपतकालीन रूपमा विद्युत आपूर्ति कटौती गरिएको छ।
युक्रेनी ऊर्जा मन्त्रालयले सामाजिक सञ्जालमार्फत जानकारी दिँदै रूसी आक्रमणले एकीकृत ऊर्जा प्रणालीमा गम्भीर असर पारेको र त्यसको प्रतिकूल असर कम गर्न केही क्षेत्रहरूमा विद्युत खपतमा प्रतिबन्ध लगाइएको जनाएको छ।
मुख्य रूपमा देशको मध्य र पूर्वी भागका क्षेत्रहरूमा कटौती लागू गरिएको छ। डोनेट्स्कलगायत प्रभावित क्षेत्रका अधिकारीहरूले रूसी सेनालाई ऊर्जा ग्रिडमाथिको आक्रमण रोक्न अपिल गरेका छन्।
दक्षिणी जापोरिझिया क्षेत्रमा भने औद्योगिक उपभोक्तामाथि मात्र प्रतिबन्ध लगाइएको मन्त्रालयले स्पष्ट पारेको छ। उक्त क्षेत्र युरोपकै ठूलो आणविक ऊर्जा केन्द्र रहेको स्थान पनि हो, जहाँ रूसी सेनाले आंशिक नियन्त्रण कायम गरिरहेको बताइएको छ।
किरोभोग्राड क्षेत्रमा आंशिक कटौती लागू गरिने जनाइएको छ।
क्रेमलिनले पछिल्ला केही सातादेखि युक्रेनी ऊर्जा संरचना र रेल सञ्जालमा आक्रमण तीव्र बनाउँदै अघिल्ला जाडो यामहरूमा गरिएको रणनीति दोहोर्याइरहेको छ। ती आक्रमणहरूले लाखौं नागरिकलाई कठोर चिसोमा बिजुलीविहीन जीवन बिताउन बाध्य बनाएको छ।
सन् २०२२ को फेब्रुअरीमा पूर्ण आक्रमण सुरु गरेयता, मस्कोले युक्रेनी सेनाको आपूर्ति प्रणालीलाई कमजोर पार्न ऊर्जा पूर्वाधारलाई लक्षित गर्ने नीति अपनाएको दाबी गर्दै आएको छ।
आक्रमणको असरले ऊर्जा प्रणालीमा चाप बढाएको र जनताको सुरक्षाका लागि निर्धारित रूपमा विद्युत कटौती गर्नुपर्ने अवस्था आएको ऊर्जा मन्त्रालयले जनाएको छ।