म्याग्दी। धवलागिरि गाउँपालिकामा यस वर्ष निर्माण सम्पन्न भएका दुईवटा योजनामार्फत चारसय ४० घरपरिवार लाभान्वित भएका छन्।
धवलागिरि गाउँपालिका-७ को मच्छिम, शिवाङ र हिलापोखरीमा तीनसय २३ तथा वडा नं ६ मा पर्ने राम्चे, मराङबेँसी र कुम्रीका एक सय १७ घरमा खानेपानी सुविधा विस्तार भएको हो।
गाउँपालिकाका प्रावधिक शाखाका प्रमुख लोकेन्द्र रावलले ठेक्कामार्फत निर्माण भएका दुईवटै योजनामा दुई करोड ३२ लाख पाँच हजार ८४ रूपैयाँ खर्च भएको बताए। आयोजना प्रभावित दुईवटा वडाका ६ वटा टोलका सबै घरमा खानेपानी वितरणका लागि मिटरसहितको धारा निर्माण भएको छ। मुहान, ट्यांकी, मुख्य र शाखा पाइपलाइन निर्माण गरेर घरघरमा सफा र स्वच्छ खानेपानी आपूर्ति हुने व्यवस्था मिलाइएको छ।
घरघरमा खानेपानी सुविधा भएपछि स्थानीयवासीलाई समयको बचत र पानी ओसार्न हुने झन्झट हटेको धवलागिरि गाउँपालिका-६ का लाल केसीले बताए। यसअघि सार्वजनिक धाराबाट खानेपानी उपभोग गर्दै आएका थिए।
मच्छिम, शिवाङ, हिलापोखरी खानेपानी योजनामार्फत मच्छिमको शिरमा रहेको बञ्चरेमा मुहानबाट पानी ल्याएर वितरण भएको छ। यो योजनाका लागि एक करोड ३६ लाख ३४ हजार ३११ रूपैयाँ खर्च भएको छ।
एक करोड १३ लाख ४९ हजारमा आर्थिक वर्ष २०७८/७९ मा ठेक्का सम्झौता र यस वर्ष सकिएको मराङको खानेपानी योजनामा एक करोड सात लाख ५२ हजार २१२ रूपैयाँ भुक्तानी भएको छ। मराङ खानेपानी योजनाबाट खानेपानी वितरण भइसकेको छ।
मच्छिम, शिवाङ, हिलापोखरी खानेपानी योजनाको संरक्षणको परीक्षण सफल भए पनि प्रयोगमा आएको छैन। धवलागिरि गाउँपालिका-७ का वडाध्यक्ष अशोक खत्रीले उपभोक्ता समिति गठन गरेर योजना हस्तान्तरण र बर्खा सकिएपछि सञ्चालन गरिने बताए।