काठमाडौँ : बलिउडका चर्चित अभिनेता गोविन्दा र उनकी पत्नी सुनिता आहुजाबीच सम्बन्धविच्छेदको चर्चा पछिल्लो समय सामाजिक सञ्जालमा व्यापक बनिरहेको छ। यो विषयमा थप चर्चा त्यतिबेला चुलिएको थियो जब सुनिताले आफ्नै युट्युब भ्लगमार्फत सम्बन्धविच्छेदसम्बन्धी हल्लालाई सम्बोधन गरिन्।
तर छोरी टीना आहुजाले यी सबै खबरहरूलाई असत्य र निराधार भएको बताएकी छन्। उनले स्पष्ट शब्दमा भनिन्, “सबै अफवाह हुन्, म यस्ता कुरामा ध्यान दिँदिन। मलाई मेरो सुन्दर परिवारप्रति गर्व छ। साथै मिडिया, प्रशंसक र शुभचिन्तकहरूबाट पाइरहेको माया र समर्थनप्रति आभारी छु।”
सामाजिक सञ्जालमा विभिन्न अड्कलबाजी भइरहँदा अभिनेता गोविन्दा मुम्बई अन्तर्राष्ट्रिय विमानस्थलमा शुक्रबार साँझ देखिएका थिए। उनी सेतो पोशाकमा ढुक्क र तनावमुक्त मुद्रामा देखिएको रिपोर्टहरूमा उल्लेख छ।
अदालतसम्म पुगेको सम्बन्धविच्छेदको प्रक्रिया ?
रिपोर्टहरू अनुसार, सुनिताले सन् २०२४ डिसेम्बर ५ मा मुम्बईको बान्द्रा परिवार अदालतमा सम्बन्धविच्छेदको निवेदन दर्ता गरेकी थिइन्। हिन्दू विवाह ऐन, १९५५ को धारा १३(१) अन्तर्गत व्यभिचार, क्रूरता र परित्यागलाई आधार बनाएर मुद्दा दायर गरिएको बताइन्छ।
अदालतले गोविन्दालाई पेशीमा बोलाए पनि उनी सन् २०२५ मे महिनासम्म अदालतमा उपस्थित भएका थिएनन्। यद्यपि, हाल अदालतको आदेशअनुसार दुवै परामर्श प्रक्रियामा सहभागी छन्। सुनिता आफैं उपस्थित भएर सुनुवाइमा भाग लिइरहेकी छन् भने गोविन्दाको उपस्थिति व्यक्तिगत रूपमा वा भर्चुअल रूपमा भएको हो कि होइन भन्ने कुरा भने अस्पष्ट छ।
गोविन्दाका वकिल ललित बिन्दलले फेब्रुअरी २०२५ मा सार्वजनिक वक्तव्य दिँदै, सुनिताले करिब छ महिना अघि सम्बन्धविच्छेदको निवेदन दिएको पुष्टि गरेका थिए। तर उनले यो पनि बताएका थिए कि अहिले दम्पतीबीच सम्बन्धमा सुधार आएको छ र उनीहरू “सधैं सँगै रहने” अवस्थामा पुगेका छन्।
सुनिताले पनि अप्रिल २०२५ मा एक प्रतिक्रियामा भनेकी थिइन्, “जबसम्म हामी आफैंले केही भन्दैनौं, कुनै पनि खबरमा विश्वास नगर्न अनुरोध गर्छु।”
गोविन्दा र सुनिताले सन् १९८७ मा विवाह गरेका थिए। उनीहरूका दुई सन्तान – छोरी टीना र छोरा यशवर्धन छन्।
हालका रिपोर्टहरू र परिवारको प्रतिक्रियाबाट हेर्दा गोविन्दा र सुनिताबीचको सम्बन्धविच्छेदको चर्चा केवल हल्ला मात्र हुन सक्ने देखिन्छ। वास्तविकता चाहिँ समयसँगै प्रस्ट हुँदै जानेछ।