नयाँदिल्ली । भारतीय प्रधानमन्त्री नरेन्द्र मोदी यही अगस्ट महिनाको अन्त्यमा चीन भ्रमणमा जाने भएका छन्। अगस्ट ३१ मा चीनको तियानजिन सहरमा आयोजना हुने साङ्घाई सहयोग संगठन (SCO) को शिखर सम्मेलनमा मोदीले सहभागिता जनाउने कार्यक्रम तय भएको छ।
उनको भ्रमणबारे चीनका विदेशमन्त्री वाङ यी र भारतका सुरक्षा सल्लाहकार अजित डोभालबीच नयाँदिल्लीमा मङ्गलबार भएको वार्ताका क्रममा जानकारी दिइएको हो।
यो भ्रमण सन् २०१८ पछि मोदीको पहिलो चीन यात्रा हुनेछ। भारतका सुरक्षा सल्लाहकार डोभालले बैठकमा प्रधानमन्त्री मोदीको भ्रमणले भारत–चीन सम्बन्धमा “नयाँ ऊर्जा थप्ने” विश्वास व्यक्त गरेका थिए।
चीनले पनि मोदीको भ्रमणलाई विशेष महत्व दिएको जनाएको छ। विदेशमन्त्री वाङ यीले भने, “स्वस्थ र स्थिर चीन–भारत सम्बन्धले दुवै देशको दीर्घकालीन हितमा योगदान पुर्याउँछ भन्ने कुरा इतिहास र यथार्थले पुष्टि गरेको छ।”
वाङ यीले प्रधानमन्त्री मोदीलाई सम्मेलनपछि व्यक्तिगत रूपमा भेट्ने कार्यक्रम पनि रहेको जानकारी दिएका छन्।
भारत र चीनबीच लामो समयदेखि दक्षिण एसियामा प्रभाव जमाउने प्रतिस्पर्धा रहँदै आएको छ। सन् २०२० मा दुवै देशबीच घातक सीमा झडपसमेत भएको थियो। त्यसयता सम्बन्धमा चिसोपन देखिए पनि पछिल्लो समय दुई देशबीच कूटनीतिक संवाद सक्रिय हुँदै गएको छ।
भारत हाल क्वाड सुरक्षा गठबन्धन (अमेरिका, अस्ट्रेलिया र जापानसहित) को सदस्य रहेकोले चीनले त्यसलाई चुनौतीका रूपमा लिँदै आएको छ। तर पछिल्लो समय वैश्विक व्यापार र भू-राजनीतिक उतारचढावबीच दुवै देशबीच सम्बन्ध सुधारतर्फ चासो बढेको देखिएको छ।
यसै सन्दर्भमा, सोमबार भारतका विदेशमन्त्री सुब्रह्मण्यम जयशङ्करसँगको वार्तामा वाङ यीले भनेका थिए, “हामीले एकअर्कालाई विरोधी होइन, साझेदार र अवसरका रूपमा हेर्नुपर्ने समय आएको छ।”