काठमाडौं । अमेरिकी सरकारले अमेरिकी कानुन उल्लंघन र भिसाको अवधि नाघेर बसोबास (ओभरस्टे) गरेको आरोपमा ६ हजारभन्दा बढी अन्तर्राष्ट्रिय विद्यार्थीको भिसा रद्द गरेको छ। अमेरिकी विदेश मन्त्रालयले यस कारबाहीलाई आप्रवासन नियन्त्रणसम्बन्धी नीतिगत कडाइको भाग भएको जनाएको छ।
भिसा रद्द हुनेमध्ये झण्डै ४ हजार विद्यार्थीको भिसा सामान्य कानुन उल्लंघनका आधारमा रद्द गरिएको हो। तीमध्ये धेरैजसो मादक पदार्थ सेवन गरी सवारी चलाउने, चोरी गर्ने, वा हिंसात्मक गतिविधिमा संलग्न भएको पाइएको मन्त्रालयको दाबी छ।
यसबाहेक आईएनए ३ बी (INA 3B) अन्तर्गत २००–३०० विद्यार्थीको भिसा आतंकवादसम्बन्धी आरोपमा रद्द गरिएको जनाइएको छ। यद्यपि, मन्त्रालयले ‘आतंकवादलाई समर्थन गर्ने’ भन्ने आरोपको विस्तृत व्याख्या भने सार्वजनिक गरेको छैन।
केही स्रोतका अनुसार, प्यालेस्टाइनको पक्षमा गरिएको प्रदर्शन र कथित यहूदी विरोधी गतिविधिका आधारमा समेत कतिपय विद्यार्थीको भिसा खारेज गरिएको देखिन्छ। ट्रम्प प्रशासनकालदेखिकै कडा आप्रवासन नीतिहरू बाइडेन प्रशासनले पनि केही अवस्थामा निरन्तरता दिइरहेको विश्लेषण गरिएको छ।
यस कदमले अमेरिकामा अध्ययनरत तथा अध्ययन गर्न इच्छुक अन्तर्राष्ट्रिय विद्यार्थीहरूमा थप अन्योल र दबाब सिर्जना गरेको जनाइएको छ।