ई–आर्थिक, काठमाडौं । गएरातिदेखिको वर्षाले अरनिको राजमार्गअन्तर्गत सूर्यविनायक–जगाति सडकमा आवतजावतमा समस्या भएको छ । वर्षाका कारण सूर्यविनायक–जगाति हुँदै काभ्रेपलाञ्चोक जाने निर्माणाधीन सडक एकतर्फी सञ्चालन गरिएको छ ।
भक्तपुर र काभ्रे जोड्ने राजमार्गमा छ लेनको सडक निर्माणमा ढिलाइ हुँदा वर्षाले भक्तपुर खण्डमा जोखिम बढेको छ । यसैले अरनिको राजमार्ग एकतर्फी सञ्चालन गर्नुपरेको हो । सवारीसाधन चिप्लिएर जोखिम बढेपछि काभ्रेबाट भक्तपुरतर्फ आउने सवारीलाई मात्र साँगाबाट आउन दिइएको छ ।
उनका अनुसार भक्तपुरबाट काभ्रे जाने दुईपाङ्ग्रे र हल्का चारपाङ्ग्रे सवारीलाई जगातिबाट च्याम्हासिंह हुँदै ताथली–नाला सडकबाट बनेपा पुग्ने गरी डाइभर्सन गरिएको छ । ठूला मालवाहक सवारीलाई सल्लाघारीको चौर र जगातिमा रोकिएको छ । जगाती–साँगा हुँदै जाने सबैजसो सवारी नाला रोड हुँदै गुड्न थालेपछि सो सडकमा समेत जाम भएको छ ।
सूर्यविनायक–धुलिखेल सडकखण्ड निर्माणाधीन भएकाले साँगा खण्डमा हल्का वर्षाले पनि सडक हिलाम्मे हुन्छ ।
गाडी चिप्लिएर सयौँ फिट तल खस्ने जोखिम छ । बाटो हिलाम्मे भएपछि ठूला सवारी उक्लन नसक्ने, सडकमै भासिने र साना सवारी चिप्लेर लड्ने गरेको ट्राफिक प्रहरीले जनाएको छ । वर्षामा जोखिम बढे पनि समस्या समाधानका लागि तीव्र गतिमा काम नहुँदा समस्या आएको छ ।