ई-आर्थिक, काठमाडौं । नेकपा एमालेका नेता रघुजी पन्त शिक्षामन्त्रीमा नियुक्त हुने भएका छन् । उनलाई प्रधानमन्त्री केपी शर्मा ओलीले नियुक्त गर्ने तयारी गरेको स्रोतले जानकारी दियो ।
शिक्षक आन्दोलनको दबाब झेल्न नसकेपछि गत ८ वैशाखमा विद्या भट्टराईले मन्त्री पदबाट राजीनामा दिएकी थिइन् । लगत्तै रिक्त पदमा एमालेले पन्तलाई मन्त्री बनाउन लागेको हो । पन्तले भोलि ४ बजे सपथ लिने पनि स्रोतले दावी गरेको छ ।
नेकपा एमालेका प्रतिनिधी सभाको समानुपातिक सांसद पन्त यसअघि २०६३ सालमा श्रममन्त्री भएका थिए ।
यसैबीच जलस्रोत तथा उर्जा राज्यमन्त्री पूर्णबहादुर तामाङ (कान्छाराम) प्रधानमन्त्री केपी शर्मा ओलीको बर्खास्तीमा परेका छन् ।
प्रधानमन्त्री ओलीले नेपाली कांग्रेसको सिफारिसमा राज्यमन्त्री तामाङलाई हटाएको समाचार स्रोतले बताएको छ ।
उनलाई हटाउनुको कारणमा कुलमान घिसिङ कारक बनेका छन् । मन्त्री तामाङले घिसिङलाई हटाएको खुलेरै विरोध गरेका थिए । उनलाई नेपाली कांग्रेसले राजीनामा दिन आग्रह गरेको थियो तर तामाङले मानेका थिएनन् त्यही कारण पनि उनी बर्खास्तीमा परेका हुन् ।