पोखरा विमानस्थलमा ‘भ्रष्टाचार भएको निष्कर्ष’सहितको प्रतिवेदनबारे संसदीय उपसमितिकै सदस्यहरूबीच विवाद

उपसमितिका केही सदस्यको असन्तुष्टि

‘पोखरा क्षेत्रीय अन्तर्राष्ट्रिय विमानस्थलको स्थलगत अध्ययन तथा अनुगमन प्रतिवेदन २०८१’ मा उपसमितिका १० मध्ये पाँच जना सदस्यहरूले मात्रै हस्ताक्षर गरेका छन्। हस्ताक्षर नगर्नेमा सत्तारूढ दल नेपाली कांग्रेस र एमालेका केही सांसदहरू रहेको बताइएको छ।

हस्ताक्षर नगरेका कतिपय उपसमिति सदस्यले उक्त प्रतिवेदन सार्वजनिक लेखा समितिमा नपुग्दै सार्वजनिक भएकोप्रति असन्तुष्टि जनाउँदै अब लेखा समितिकै बैठकमा आफ्नो राय राख्ने बताएका छन्।

काङ्ग्रेसका रामकृष्ण यादवले भने आफू संसद्को अधिवेशन सकिएलगत्तै धनुषा गएको र लेखा समितिमै आफ्नो धारणा राख्ने बताए।

“संयोजकले आफूअनुकूलको समयमा बैठक राख्नुभयो। त्यसको जानकारी राम्ररी पाइएन। बीचमा बैठक भयो, मैले त्यो थाहा पाइनँ। अब समितिको बैठकमा मात्रै प्रतिवेदनबारे आफ्नो धारणा राख्छु,” उनले भने।

त्यस्तै हस्ताक्षर नगरेका एमालेका सांसद तारा लामाले उपसमितिबाट परिपक्व नभईकन प्रतिवेदन बाहिरिएकोप्रति असन्तुष्टि जनाउँदै अब आफ्नो राय सार्वजनिक लेखा समितिमै राख्ने बताए।

“उपसमितिको बैठक बस्यो, यो प्रतिवेदनमा धेरै कुरा प्राविधिक रूपमा नमिल्दा सच्याएर लेख्ने र हस्ताक्षर गर्ने भन्ने कुरा थियो। मचाहिँ ३ गते नै काठमाण्डू पुगेको हुनाले प्रतिवेदन पढेर हस्ताक्षर गरौँला भनेको, त्यही चरणमा लेखा समितिमै नपुगी (प्रतिवेदन) बाहिरिएको रहेछ,” लामाले भने।

“पूर्ण समितिमा नपुग्दै उपसमितिबाट बाहिरिनु त राम्रो भएन। यसको मनसाय नै गलत देखियो।”