ई–आर्थिक, काठमाडौं । राष्ट्रिय सहकारी बैंकका अध्यक्ष केबी उप्रेतीलाई प्रहरीले पक्राउ गरेको छ । आइडियल यमुना हाम्रो सहकारी संस्थाका अध्यक्ष समेत रहेका उप्रेतीलाई ८ अर्ब हिनामिना गरेको आरोपमा प्रहरीले पक्राउ गरेको हो ।
बालाजुबाट बुधबार बिहान पक्राउ परेका उप्रेतीलाई बालाजु प्रहरीवृत हुँदै अहिले महाराजगञ्ज प्रहरीवृतमा राखिएको छ ।
३० हजारभन्दा बढी बचतकर्ताको ८ अर्ब रुपैयाँ बचत रहेको आइडियल यमुना हाम्रो सहकारी संस्था अध्यक्ष उप्रेती विरुद्ध बचत रकम हिनामिना जाहेरी परेपछि प्रहरीले पक्राउ गरेको हो । उप्रेतीसँगै सहकारीका अन्य सञ्चालकमाथि पनि बचतकर्ताहरूले उजुरी हालेका छन् ।
पक्राउ पुर्जी जारी रहेकाले संस्थाका सञ्चालकहरू भने हाल फरार छन् ।
रकम हिनामिनाको आरोप लागेपछि नेकपा एमालेको सहकारी तथा गरिबी निवारण विभागका सचिवसमेत रहेका उप्रेतीलाई बचतकर्ताको रकम हिनामिना गरेको आरोप लागेपछि पार्टीले जिम्मेवारीबाट हटाइदिएको छ ।
रकम हिनामिनाको आरोप लागेर उप्रेतीलाई पक्राउ गरेपनि राष्ट्रिय सहकारी बैंकले भने अध्यक्षबाट अझै हटाएको छैन् । बैंकको आधिकारिक वेबसाइडमा उप्रेतीलाई नै अध्यक्ष राखेको छ । बैंकमा उनी जिल्ला सहकारी संघ लिमिटेड काठमाडौंको तर्फबाट प्रतिनिधित्व गरेका थिए ।