ई–आर्थिक, काठमाडौं । नेशनल हाइड्रोपावर कम्पनीको साधारणसभा बस्ने तेस्रोपटकको प्रयास पनि असफल भएको छ । सञ्चालक र शेयरधनी बीच विवाद भएपछि कम्पनीको २७ औ वार्षिक साधारण सभा स्थगित भएको छ ।
यसअघि दुुईपटक बस्ने प्रयास गरिए पनि कम्पनी साधारणसभा बस्न सकेको थिएन ।
सभामा विवादका कारण स्थगित भएपनि गणपूरक सङ्ख्या नपुगेको भन्दै सभा स्थगित गरिएको हो । कम्पनीले यसअघि मंसिर २२ र पुस ६ गते बोलाइएको सभामा पनि गणपूरक सङ्ख्या नपुगेकाले भन्दै सभा स्थगित गरेको थियो ।
कम्पनीले डेलिश ओपेरा रेष्ट्रो एन्ड ब्यांकेट बालुवाटारमा सभा बोलाइएको थियो ।
सभामा उपस्थित एक शेयरधनीका अनुसार खासगरि शेयरधनीहरू सञ्चालकसँग रिसाएका थिए । उनीहरूले कहिल्यै शेयरधनीलाई लाभांश नदिएको भन्दै चित्त दुखाएका थिए । त्यही बीचमा शेयरधनी अलि बढी नै आक्रोशित हुँदै गएपछि सभा हलमै तनाव सिर्जना भएको थियो । पछि सञ्चालकहरू समेत खनिन थालेपछि सभा स्थगन गर्नुको विकल्प भएन।
कम्पनीले सभाका लागि मंसिर ७ गते नै बुक क्लोज गरिसकेको छ।