ई–आर्थिक, काठमाडौं । भन्सार विभागले स्वचालित निकासी पैठारी संकेत नम्बर (एक्जिम कोड) प्रणालीको सुरुवात गरेको छ । अब अनलाइनमार्फत उक्त एक्जिम कोडको नवीकरण गर्न सकिने व्यवस्था विभागले सुरु गरेको छ । उक्त व्यवस्थाको विभागका महानिर्देशक सुमन दाहालले एक कार्यक्रमका बीच गरेका थिए ।
भन्सार विभागले निकासी/पैठारी संकेत नम्बर नवीकरण गर्दा भन्सार नियमावली, २०६४ को नियम ६६(घ) बमोजिम कर चुक्ताको प्रमाणपत्र र नवीकरण गरिने अवधिसम्म म्याद भएको तीन लाख रुपैयाँको बैंक जमानत पेश गर्नुपर्ने व्यवस्था रहेकोे थियो । त्यसैगरी नवीकरण गर्दा नवीकरण दस्तुर समेत बुझाउनुपर्छ । हालसम्म प्रयोग भईरहेको प्रणालीमा नवीकरण दस्तुर वुझाउने, बैंक जमानत तथा करचुक्ता प्रमाणपत्र पेश गर्ने कार्यको लागि भन्सार विभाग वा भन्सार कार्यालयहरुमा उपस्थित हुनुपर्ने व्यवस्था रहेको थियो । तर विभागले गरेको यो नयाँ व्यवस्थाले सेवाग्राहीलाई धेरै सजिलो हुने भएको छ ।
नवीकरणका लागि विभागले सेवाग्राहीलाई लगइन युजर आईडी र पासवर्ड उपलब्ध गराएको छ । त्यही युजर आईडी र पासवर्डले ३० हजार सेवाग्राहीलाई घरबाटै कोड लिन सक्ने व्यवस्था विभागले गरेको छ ।
विभागको वेबसाइटबाट समेत यसको व्यवस्था गरिएको छ । नवीकरणका लागि कनेक्ट आईपीएसबाट ई–पेमेन्ट गर्न सकिने व्यवस्था समेत विभागले मिलाएको छ ।