ई–आर्थिक, काठमाडौं । इन्टरनेट र केवुल टेलिभिजन सेवा प्रदायक सेवा कम्पनी सुविसु केवुल नेटवर्कको कार्यालयमा विशाल आगलागी भएको छ ।
काठमाडौंको बालुवाटारमा रहेको उक्त कार्यालयमा आज बुधबार दिउँसो आगलागी भएको हो ।
सुविसुको मुख्य सर्भर रहेको भवनमा आगलागी भएपछि सुविसीको सम्पूर्ण सेवा अबरुद्ध हुने भएको छ ।
जेनेरेटरका लागि आवश्यक इन्धन भण्डारण गरेर राखेको ठाउँबाट आगलागी सुरु भएको प्राराम्भीक अनुमान छ । २ हजार लिटर पेट्रोल भण्डारण गरेको ठाउँबाट आगो सल्किएको प्रहरीले जानकारी दिएको छ ।
आगो निभाउन नेपाल प्रहरी, नेपाली सेना, जुद्ध वारुण यन्त्रका दमकलहरु प्रयोग गरेर आगलागी नियन्त्रणमा लिइएको छ । आगलागी नियन्त्रणमा लिन सजिलो होस भनेर सुविसु कार्यालय अगाडिको सडकमा सवारी आवागमनमा रोक लगाइएको थियो ।
करोडौंको पूर्वाधार जलेर नष्ट भए पनि कुनै मानविय क्षति नभएको प्रहरीले जानकारी दिएको छ ।