पाँच दशक बित्दा पनि विस्तार हुन सकेन विमानस्थल, ४० सिटे जहाज सञ्चालनको माग अझै अधुरै
जुम्ला । जुम्ला विमानस्थल स्तरोन्नति गर्ने आश्वासन पटक–पटक दिइए पनि कार्यान्वयनमा आउन नसक्दा यहाँको हवाई सेवा अझै सीमित बनेको छ । विमानस्थलमा भएका तीन वटा विमान दुर्घटनामा १३ जनाले ज्यान गुमाइसकेका छन् । तर पाँच दशकभन्दा बढी समय बितिसक्दा पनि विमानस्थलको पूर्वाधार र धावनमार्गको अवस्थामा अपेक्षित सुधार हुन सकेको छैन ।
२०५५ साल माघ ३ गते नेकोन एयरको विमान धावनमार्गमै दुर्घटना हुँदा चालक दलका सदस्यसहित पाँच जनाको मृत्यु भएको थियो भने सात जना घाइते भएका थिए । त्यस्तै, २०६३ साल असार ७ गते यती एयरलाइन्सको विमान दुर्घटनामा चालक दलका तीन सदस्यसहित आठ जनाले ज्यान गुमाएका थिए ।
यसैगरी, २०७५ साल जेठ २६ गते अवतरणका क्रममा तारा एयरको विमान दुर्घटनामा परेर ध्वस्त भएको थियो । उक्त दुर्घटनामा विमानमा सवार १८ जना यात्रु भने सकुशल रहेका थिए ।
विमानस्थल स्तरोन्नति र नियमित हवाई उडान सञ्चालन गर्ने विषयमा पटक–पटक आश्वासन आए पनि ती कार्यान्वयन हुन सकेका छैनन् । विमानस्थल विस्तारका लागि विस्तृत परियोजना प्रतिवेदन (डिपिआर) तयार भइसकेको भए पनि त्यसअनुसार काम अघि बढ्न नसकेको उहाँले बताउनुभयो ।
विमानस्थल विस्तारका लागि आर्थिक वर्ष २०७९/८० मा एक करोड रुपियाँ बजेट विनियोजन गरिएको थियो । तर, उक्त रकम खर्च हुन नसक्दा फ्रिज भएको थियो । त्यसपछि पनि जग्गा अधिग्रहण र पूर्वाधार विस्तारका योजना अघि सारिए पनि उल्लेख्य प्रगति हुन सकेको छैन ।
हाल जुम्ला विमानस्थलको धावनमार्ग ६७० मिटर लामो र २५ मिटर चौडा छ । यस विमानस्थलमा साना ट्विनअटर जहाज मात्रै अवतरण गर्न सक्छन् । विमानस्थल विस्तार गरी ४० सिट क्षमताका जहाजसमेत सञ्चालन गर्न सकिने व्यवस्था मिलाउनुपर्ने माग स्थानीयवासीले लामो समयदेखि गर्दै आएका छन् ।
विमानस्थल विस्तारका लागि चन्दननाथ नगरपालिका–१ र २ मा १८३.८० रोपनी जग्गा अधिग्रहण गर्नुपर्ने देखिएको छ । २०२९ साल असोज १५ गतेदेखि सञ्चालनमा आएको विमानस्थल स्थानीयवासीको श्रमदान र राज्यको पहलमा निर्माण गरिएको थियो ।
सञ्चालनमा आएको पाँच दशकभन्दा बढी समय बितिसक्दा पनि समयअनुसार पूर्वाधार विस्तार हुन नसक्दा जुम्लाको हवाई सेवा सीमित उडानमा निर्भर रहँदै आएको छ ।
हाल नेपाल एयरलाइन्स, सीता एयर, तारा एयर र समिट एयरले जुम्लामा हवाई सेवा दिँदै आएका छन् । तर, विमानस्थलको सीमित क्षमता र साना जहाजमा निर्भर रहनुपर्ने बाध्यताका कारण यात्रुले सहज र नियमित हवाई सेवा पाउन सकेका छैनन् ।
स्थानीयवासीले सुरक्षित, भरपर्दो र सहज हवाई सेवाका लागि विमानस्थल स्तरोन्नत्तिलाई सरकारले प्राथमिकतामा राख्नुपर्ने माग गरेका छन् । उनीहरूले वर्षौंदेखि दोहोरिँदै आएको विस्तारको आश्वासन अब व्यवहारमा उतार्दै जग्गा अधिग्रहण, बजेट व्यवस्थापन र पूर्वाधार निर्माणको काम तत्काल अघि बढाउन आग्रह गरेका छन् ।