ई–आर्थिक, काठमाडौं । ग्रीन डेभलपमेन्ट बैंकको दुई आर्थिक वर्षको साधारण सभा मंगलवार सम्पन्न भएको छ । मंगलवार सम्पन्न बैंकको दशौं र एघारौं वार्षिक साधारण सभाले बैंकको ३ दशमलव ८ प्रतिशत बोनस र कर प्रयोजनको लागि शून्य दशमलव २० प्रतिशत नगद लाभांश वितरण गर्ने प्रस्ताव पारित गरेको हो ।
सभाले बैंकको संस्थापक शेयर र सर्वसाधारण शेयरको अनुपात ५१ः४९ प्रतिशत कायम हुने प्रस्ताव पनि पारित गरेको छ । संयुक्त साधारण सभाबाट संस्थापक शेयरधनीको प्रतिनिधित्व गर्ने तीन जना सञ्चालक निर्विरोध निर्वाचित भएका छन्, जसमा गणेश कुमार श्रेष्ठ, कृष्ण शंकर श्रेष्ठ र मनोविज्ञान श्रेष्ठ छन् । त्यस्तै, सभाले सर्वसाधारण सेयरधनीको प्रतिनिधित्व गर्ने दुई जना सञ्चालकको नियुक्ति अनुमोदन गरेको छ ।
उक्त सभाले आर्थिक वर्ष २०७८/७९ र २०७९/८० को वार्षिक प्रतिवेदन छलफल गरी पारित गर्नुका साथै चालू आवको लेखापरीक्षणको लागि लेखापरीक्षकको नियुक्ति र निजको पारिश्रमिक निर्धारण गर्ने प्रस्ताव पनि पारित गरेको हो ।