१६ चैत, काठमाडौं । एनआइसी एसिया बैंकले बुधबारदेखि हकप्रद निष्कासन गरेको छ । बैङ्कले १ सय बराबर १५ को अनुपातमा ८७ लाख २९ हजार ४ सय ७५ कित्ता हकप्रद शेयर निष्कासन तथा विक्री खुला गर्न लागेको हो ।
बैंकले चैत १६ गते देखि आगामी बैशाख १९ गतेसम्म हकप्रद आवेदन दिन सकिने जनाएको छ । चैत ६ गतेसम्म दोस्रो बजारमा शेयर खरीद गर्ने लगानीकर्ताले हकप्रदमा आवेदन दिन सक्छन ।
बैंकले हकप्रद निस्कासनकालागि सिभिल क्यापिटललार्इ बिक्री प्रबन्धक तोकेको छ । बैंकले राष्ट्र बैंकले तोकेको आठ अर्ब चुक्ता पूँजी पुर्याउन गत वर्ष पनि २५ प्रतिशत हकप्रद निष्कासन गरेको थियो ।
हाल पाँच अर्ब ८१ करोड चुक्ता पूँजी रहेको बैंकले पुस मसान्तसम्म ७२ करोड खुद मुनाफा आर्जन गरेको छ । गएको वर्षको मुनाफा बाट २७.३७ प्रतिशत बोनस दिएको कम्पनीले पुन हकप्रद निष्कासन गर्न लागेको हो ।
