काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने श्रीमती निकिता पौडेलसहित पारिवारिक तीर्थाटनका लागि भारत प्रस्थान गरेका छन्। उनी तीनदिने भ्रमणका लागि धनगढी हुँदै भारत जान विमानस्थल पुगेका हुन्।
लामिछानेको निजी सचिवालयका अनुसार भ्रमणका क्रममा उनले परिवारसहित भारतका प्रसिद्ध धार्मिक स्थलहरूमा पूजाअर्चना गर्ने कार्यक्रम तय भएको छ।
तीनदिने भ्रमणका क्रममा लामिछाने परिवारले भारतको उत्तराखण्ड राज्यस्थित नैनीतालमा रहेको प्रसिद्ध कैंची धाम र आसामको गुवाहाटीस्थित कामाख्या मन्दिर मा दर्शन तथा पूजाअर्चना गर्ने कार्यक्रम रहेको सचिवालयले जनाएको छ।
कैंची धाम बाबा नीम करौलीसँग सम्बन्धित प्रसिद्ध धार्मिक स्थल हो। त्यस्तै, आसामस्थित कामाख्या मन्दिर हिन्दू धर्मावलम्बीहरूको महत्वपूर्ण शक्तिपीठमध्ये एक मानिन्छ। यी दुवै स्थल भारत तथा अन्य देशका श्रद्धालुहरूका लागि लोकप्रिय तीर्थस्थल हुन्।
सचिवालयका अनुसार लामिछानेको यो भ्रमण पूर्णतः निजी तथा पारिवारिक धार्मिक भ्रमण हो। भ्रमणका क्रममा कुनै औपचारिक राजनीतिक भेटघाट वा कार्यक्रम तय भएकोबारे जानकारी दिइएको छैन।
रास्वपा सभापति लामिछानेको यस भ्रमणलाई उनको निजी धार्मिक तथा पारिवारिक यात्राका रूपमा हेरिएको छ। तीनदिने भ्रमण पूरा गरी उनी स्वदेश फर्किनेछन्।